مكالمة جمالات

أنا في عرضك يا طنط جمالات، وحياة النبي، ما تكسفينيش وتبعتي لنا الواد عمرو ابنك في الفرح بتاع كوكا بنت أختي...شفته في التليفزيون يا طنط أول امبارح كان يهبل...يجنن...يا خراشي يا خراشي...إيه ده...إيه العسل ده؟ إيه الطعامة دي؟ قمر يا اخواتي قمر، وبيتكلم زي البربنط، والبت المذيعة اللي معاه مقصوفة الرقبة مش عارفة حاطّة نقرها من نقره ليه بنت الجزمة، ضاربة شعرها فازلين، وصابغاه...اكمن الواد عاجبها يعني؟

بس إن جيتي للحق يا طنط جمالات الواد يعجب الباشا، بالذات لما جاب سيرة جايزة نوبل، وميوزيكال أوورد، والكلام الكبير قوي ده، كان يهوس يا طنط، كلنا قعدنا نتفرج، والواد فريد ابني قال لي: يا ماما مش ده عمرو ابن طنط جمالات؟ ده فشيخ قوي، بيقول كلام ولا بتوع التليفزيون. راحت البت كوكا شبطانة فيه، وقعدت تتحايل علي أكلمك علشان ييجي، يبخ لنا كلمتين من الكلام الكبير بتاعه ده، أو يغني أو يرقص...ألا قولي لي من الحق...هوه المحروس ابنك بيشتغل على إيه، على أنهو موسيقى يعني؟ بيعزف على آلة ولا بيغني...بس يجنن يا طنط يجنن.

عارفة أكتر حاجة عاجباني فيه إيه؟ لما اتكلم عن القصيدة بتاعة نجيب محفوظ اللي بتقول إن مافيش دين...والبت المذيعة طلعت مش عارفة وشكلها كانت مبلولة ومكسوفة طبعاً من جهلها قدام شطارة اسم النبي حارسه وصاينه عمرو ابنك، تصوري يا طنط؟ أنا طول عمري والحباية اللي جنب مناخير الراجل نجيب محفوظ ده مش عاجباني، وحاسة إنها غضب من الله سبحانه وتعالى، قوم الواد عمرو ابنك يفسّر لي كل حاجة، أتابن البعيد كاتب الرواية بتقول مافيش دين اللي خد عليها نوبل دي،..شوفي يا اختي الراجل!!  والنبي يا اختي أنا قلبي كان حاسس، كان حاسس إن الجايزة دي لها أغراض سياسية، وإن الراجل ده مش دوغري كده...الواد عمرو ابنك ده فتح لي حاجات كتيرة كمان عن زويل راخر اللي أتابيه ما فادش البلد ولا نيلة، وقاعدين إشي زويل راح وإشي زويل جه...بلا نيلة! ييجوا إيه الصيّع دول جنب المحروس ابنك اللي فاد البلد بالمزيكا بتاعته اللي بتتعزف في كل حتة...حصوة ف عين اللي يشوفه وما يصلّيش عالنبي...

وتصوري يا طنط كل البشرية بتاعة مصر العبيطة دي ما كانتش واخدة بالها من الإعلان بتاع كوكاكولا "عبر مين قدك" 125 سنة، والقوة بين إيديك...يا ابن الجنية يا عمرو...ربنا يحميه ويخليهولك يا طنط، أتاري 125 دي يعني 25/1، يعني تاريخ الثورة، وعبّر دي يعني ثورة، والقوة يعني المولوتوف...ابنك يا طنط حل كل الألغاز اللي كانت واقفة ف زوري من ساعة الثورة في كلمتين وبس...هوه إنتوا علمتوه فين يا طنط جمالات، ده اسم النبي حارسه زي ما يكون دارس في مدارس أجنبي، يا طنط أنا ف عرض دين النبي، ما تخليهوش ينام الليلة دي إلا أما تتفقي معاه إنه ييجي فرح كوكا، لحسن البت هتموت لو ماجاش..حاكلمك الساعة عشرة تاني أطمن عملتي إيه.