والله لأنساكي
فنان الجيل، كل جيل وأي جيل...
فنان العميق بالقوي...
فنان الناس الطيبة وكل الناس في كل المناطق من سموحة لعرب المحمدي
فنان الشعب بكل أطيافه ومعانيه وملامحه
فنان المطروالعواصف وأنغامات الأشياء المتسلطنة جوه نيني العين، وف عمق لغاليغ القلب
الفنان الملهم العاطفي المتناهي في صيرورة البشر والقمر وكل كواكب الكون الكبير
عين أعيان السبتية وتجار رولمان البلي في شارع ابراهيم فكري
وأجدع بطل في اساس منطق الأساطير الإغريقية والرومانية
مستقبل الفن في مصر والمنّئة (المنطقة) العربية والإفريقية والشرق أوسطية وبلاد الماو ماو
ماضي الفن العريق المتكامل المنجرف نحو حضارات آشور وبابل وقلعة الكبش
حاضر الثورة المصرية، ومستقبل مصر بعد وأثناء ومن خلال وحول كل المفاهيم المتصلة بواقع ما بعد الحداثة
من الآخر هوه ده الفن اللي كنت بادور عليه من زمان وأخيراً لقيته
رسالة من القلب للدكتور شاكر عبد الحميد وزير الثقافة وللدكتورة إيناس عبد الدايم رئيس مجلس إدارة الأوبرا المصرية للإلتفات لهذه المواهب الشابة...يا جماعة حنفضل نتجاهل الفن الجاد ده لحد إمتى، ما هوه ده سبب البلاوي اللي احنا فيها..
رسالة لنقيب الموسيقيين بالإلتفات لصرخة الضمير المتماهي مع طبيعة الحالة الذكورية عند طائر أبوقردان اللي بنلمح آثارها بشكل واضح في العمل الفني المتميز اللي قدامنا ده
والنبي يا جماعة، سايق عليكم النبي محمد، وجميع الأنبيا بتوع مصر والخارج، ما تسيبوش الفن بتاعنا يضيع والتفتوا للفنان صاحب الكليب ده، عايزين زقة يا جماعة علشان المكنة تدور..
مكنة الثقافة عايزة ارهاصات من هذا النوع علشان نقدر نخرج من عنق الزجاجة ونتربع كده، ونبقى فلة ونرزق بإذن الرحمن..
يلى يا شباب اقعدوا بالعافية، وأوعوا تنسوا إن كلنا هنحلف سوا تلاتة ميتين طلاق مع المغني العبقري اللامع إننا حننساها..
والله لأنساكي
والله لأنساكي
والله لأنساكي
Comments
Post a Comment